FYLGI FLOKKA Í ÁGÚST

Heim / Fréttir / FYLGI FLOKKA Í ÁGÚST

Samkvæmt könnun Maskínu sem framkvæmd var í ágúst eykst fylgi ríkisstjórnaflokkanna. Fylgi Vinstrihreyfingunnar – grænt framboð stendur í stað með 14,2% en bæði Sjálfstæðisflokkur og Framsóknarflokkur bæta við sig frá því í fyrri könnun. Sjálfstæðisflokkur nú með 23,4% en var með 20,9% í síðustu mælingu og Framsóknarflokkur með 12,6% nú en var með 9,9% í síðustu mælingu. Bæði Píratar og Viðreisn mælast minni nú en í síðustu mælingu en aðrir flokkar stjórnarandstöðunnar mælast með svipað fylgi og í síðustu mælingu okkar í júlí.

Ánægja með störf ríkisstjórnarinnar almennt helst óbreytt frá fyrri könnun en ánægja með störf stjórnarandstöðu dalar talsvert eða úr 15,8% niður í 10,4%.

Nánar má lesa um helstu niðurstöður könnunarinnar á visir.is og ítarlegri niðurstöður má svo nálgast hér í pdf. skýrslu.

Svarendur könnunar voru 822 talsins, koma úr Þjóðgátt Maskínu, sem er þjóðhópur fólks (e. panel) sem er dreginn með tilviljun úr Þjóðskrá og svarar á netinu. Svarendur eru alls staðar að af landinu og á aldrinum 18 ára og eldri. Gögnin eru vigtuð með tilliti til kyns, aldurs og búsetu samkvæmt Þjóðskrá og endurspegla því þjóðina prýðilega. Könnunin fór fram dagana 13. til 23. ágúst 2021.

Í spurningavögnum Maskínu, sem lagðar eru fyrir almenning reglulega, er að finna spurningar um málefni líðandi stundar. Þessar spurningar eru samdar af starfsfólki Maskínu. Niðurstöður eru birtar á heimasíðu Maskínu og einnig sendar á helstu fjölmiðla landsins. Maskína birtir ekki fréttir upp úr könnunum sem unnar eru fyrir aðra eða eru kostaðar af öðrum né sendir út fréttatilkynningar um niðurstöður þeirra.

Notkun á efni af heimasíðu Maskínu er heimil svo fremi sem vísað sé til heimilda og þess sé getið skýrt hver uppruni gagnanna er.

Aðrar fréttir