Margir íslendingar eru íhaldssamir þegar kemur að mat um jólin og árlega spyr Maskína um hvað almenningur ætli sér að hafa í aðalrétt bæði á aðfangadag og jóladag. Niðurstöðurnar sýna að mikill meirihluti borðar hamborgarhrygg á aðfangadag og hangikjöt á jóladag. 45% borða hamborgarhrygg á aðfangadag og rúmlega 61% hangikjöt á jóladag Ef litið er til þeirra breytinga semhafa orðið í þessum efnum í gegnum árin sést að hamborgarhryggurinn er á eilitlu undanhaldi og hefur þeim sem snæða hann á aðfangadagskvöld fækkað um 8 prósentustig frá árinu 2010. Það sama er upp á tengingum þegar kemur að hangikjötinu á jóladag og hefur þeim sem borða það fækkað um 12 prósentustig frá árinu 2010.
Þriðjungur borðar skötu á Þorláksmessu
Skiptar skoðanir eru á því hvort að skötuát sé ómissandi hluti af aðdraganda jólanna. En samkvæmt Maskínu borðar um þriðjungur landsmanna skötu á Þorláksmessu. Hefur þeim fækkað nokkuð frá árinu 2011 en síðastliðin 5 ár hefur fjöldi hópsins staðið í stað.
Ítarlegri niðurstöður má finna í pdf-skýrslu hér.
Könnunin var lögð fyrir Þjóðgátt Maskínu, sem er þjóðhópur fólks (e. panel) sem dreginn er með tilviljun úr Þjóðskrá, á netinu. Alls voru svarendur 2.062, en þeir eru alls staðar að af landinu og á aldrinum 18 ára og eldri. Gögnin eru vigtuð samkvæmt Þjóðskrá og endurspegla því þjóðina með tilliti til kyns, aldurs, búsetu og menntunar. Könnunin fór fram dagana 12. til 19. desember 2024.
Í spurningavögnum Maskínu, sem lagðar eru fyrir almenning reglulega, er að finna spurningar um málefni líðandi stundar. Þessar spurningar eru samdar af starfsfólki Maskínu. Niðurstöður eru birtar á heimasíðu Maskínu og einnig sendar á helstu fjölmiðla landsins. Maskína birtir ekki fréttir upp úr könnunum sem unnar eru fyrir aðra eða eru kostaðar af öðrum né sendir út fréttatilkynningar um niðurstöður þeirra.
Í könnunum Maskínu er þess gætt sérstaklega að úrtök endurspegli fjölbreytileika samfélagsins – svo sem hvað varðar aldursdreifingu, búsetu og menntunarstig. Upplýsingar um dreifingu svarenda eftir ólíkum hópum eru birtar með niðurstöðum hverju sinni svo fjölmiðlar og aðrir notendur geti lagt sjálfstætt mat á gæði mælinganna og hvaða viðhorf þær endurspegla.
Notkun á efni af heimasíðu Maskínu er heimil svo fremi sem vísað sé til heimilda og þess sé getið skýrt hver uppruni gagnanna er.
