Tveir af hverjum þremur eru andvígir því að einkavæða ríkisútvarpið

Heim / Fréttir / Tveir af hverjum þremur eru andvígir því að einkavæða ríkisútvarpið

Um 23% Íslendinga eru ánægð með fjölmiðla á Íslandi en um fimmtungur er óánægður. Konur eru ánægðari með fjölmiðla á Íslandi en karlar og Austfirðingar eru ánægðari en aðrir Íslendingar. Kjósendur Pirata eru óánægðastir með fjölmiðla á Íslandi en kjósendur Bjartrar framtíðar, Samfylkingarinnar, Viðreisnar og Vinstrihreyfingarinnar Græns framboðs eru ánægðastir.

Tæplega 47% Íslendinga finnst fjölmiðlar á Íslandi háðir hagsmunaaðilum en á bilinu 12% til 13% finnst þeir óháðir. Á bilinu 17-18% finnst það mjög mismunandi eftir fjölmiðlum hvort þeir eru háðir eða óháðir. Yngsta fólkinu finnst að það sé mismunandi eftir fjölmiðlum hvort þeir eru háðir eða óháðir fremur en öðrum en annars er lítill munur eftir bakgrunni fólks í þessari spurningu.

Langstærstum hluta finnst skipta miklu máli að fjölmiðlar séu óháðir, eða á bilinu 87-88%, en um 8% finnst það skipta litlu máli. Eftir því sem fólk verður eldra þeim mun mikilvægara finnst því að fjölmiðlar séu óháðir. Kjósendum Viðreisnar finnst skipta minna máli en kjósendum hinna flokkanna að fjölmiðlar séu óháðir en kjósenum Vinstrihreyfingarinnar Græns framboðs og kjósendum Bjartrar framtíðar finnst skipta meira máli en öðrum kjósendum að fjölmiðlar séu óháðir.

Tveir af hverjum þremur svarendum eru andvígir því að einkavæða Ríkisútvarpið, en um 16% eru því hlynnt. Hærra hlutfall þeirra sem eru yngri en 25 ára er hlynnt því að einkavæða Ríkisútvarpið, eða meira en fimmtungur. Afstaða til þessa er mjög mismunandi eftir því hvaða flokk fólk kýs. Þannig vill rúmlega 32% þeirra sem myndu kjósa Sjálfstæðisflokkinn einkavæða Ríkisútvarpið, en einungis um 5% þeirra sem myndu kjósa Vinstrihreyfinguna Grænt framboð og Samfylkinguna. Það er þó athyglisvert að hvergi finnst meirihluti í flokkunum fyrir einkavæðingu. Svarendur voru 1.596 talsins, koma úr Þjóðgátt Maskínu, sem er þjóðhópur fólks (e. panel) sem er dreginn með tilviljun úr Þjóðskrá og svarar á netinu.

Svarendur eru af báðum kynjum, alls staðar að af landinu og á aldrinum 18-75 ára. Gögnin eru vigtuð með tilliti til kyns, aldurs og búsetu samkvæmt Þjóðskrá og endurspegla því þjóðina prýðilega. Við vigtun gagna getur birst örlítið misræmi í fjöldatölum og hlutföllum sem orsakast af námundun. Könnunin fór fram dagana 12. til 17. júlí 2017.

Skýrsluna í heild sinni má nálgast hér.

Aðrar fréttir