Hartnær 30% Íslendinga eru hlynnt auknum einkaframkvæmdum í samgöngumálum en næstum þriðjungur er andvígur þeim. Stærsti hópurinn, eða ríflega 38%, er beggja blands. Þá eru um 40% hlynnt veggjöldum ef þau flýta fyrir vegaframkvæmdum og önnur 40% andvíg þeim (20% liggja þar á milli).
Karlar eru fremur hlynntir auknum einkaframkvæmdum í samgöngum (36,4%) en konur (21,7%). Þá eru elstu Íslendingar hlynntastir einkaframkvæmd (41,3%), en yfir helmingur þeirra yngstu er á milli þess að vera hlynntur og andvígur. Þá eykst stuðningur við aukinni einkaframkvæmd í samgöngum með hærri tekjum fólks.
Eins og búast mátti við skiptir miklu máli hvar í flokki svarendur eru hvort þeir séu hlynntir eða andvígir aukinni einkaframkvæmd í samgöngumálum. Þannig eru um 60% kjósenda Sjálfstæðisflokksins hlynnt einkaframkvæmd og ríflega helmingur kjósenda Viðreisnar annars vegar, en aðeins rúmlega 9% kjósenda Flokks fólksins eru hlynnt einkaframkvæmd hins vegar. Þá er um fimmtungur kjósenda Pírata, Samfylkingar og Vinstrihreyfingar – græns framboðs hlynntur einkaframkvæmd í samgöngum og í kringum 30% kjósenda Framsóknarflokksins og Miðflokksins.
Líkt og með einkaframkvæmd í samgöngum eru elstu Íslendingar hlynntari veggjöldum sem myndu flýta fyrir vegaframkvæmdum en þeir yngri, eða um helmingur þeirra. Þá eykst stuðningur við veggjöld með lengri skólagöngu og hærri tekjum.
Skoðun á veggjöldum sem flýttu fyrir vegaframkvæmdum skiptist eftir flokkspólitík svipað og skoðun á einkaframkvæmd í samgöngum. Meirihluti kjósenda Sjálfstæðisflokksins (56,7%) og Viðreisnar (57,0%) er hlynntur slíkum veggjöldum, en aðeins sjöundi partur kjósenda Flokks fólksins (26,8%).
Svarendur voru 817 talsins og komu úr Þjóðgátt Maskínu, sem er þjóðhópur fólks (e. panel) dreginn með tilviljun úr Þjóðskrá og svarar á netinu. Svarendur eru af báðum kynjum, alls staðar að af landinu og á aldrinum 18 ára og eldri. Gögnin eru vigtuð með tilliti til kyns, aldurs og búsetu. Könnunin fór fram dagana 14.-28. desember 2018.
