Maskína hefur haft það fyrir venju að spyrja um væntingar almennings til ráðherra í ríkisstjórn, bæði mestar væntingar og minnstar, í upphafi kjörtímabils. Niðurstöðurnar eru afgerandi og sýna að almenningur hefur mestar væntingar til Kristrúnar Frostadóttur, forsætisráðherra, eða um 37% sem segjast hafa mestar væntingar til hennar á kjörtímabilinu. Á eftir henni koma Þorgerður Katrín og Alma Möller en um 11% segjast hafa mestar væntingar til þeirra.
Niðurstöðurnar eru einnig afgerandi þegar kemur að þeim ráðherra sem almenningur hefr minnstar væntingar til en þar ber Inga Sæland höfuð og herðar yfir aðra í í ríkisstjórninni en þriðjungur aðspurðra bera minnstar væntingar til hennar. Á eftir henni koma samflokksmenn hennar Áshildur Lóa og Eyjólfur Ármannsson en ríflega 12% segjast hafa minnstar væntingar til þeirra. Aðrir ráðherrar voru nefndir sjaldnar.
Ítarlegri niðurstöður er að finna í pdf-skýrslu hér.
Könnunin var lögð fyrir Þjóðgátt Maskínu, sem er þjóðhópur fólks (e. panel) sem dreginn er með tilviljun úr Þjóðskrá, á netinu. Alls voru svarendur 1.511, en þeir eru alls staðar að af landinu og á aldrinum 18 ára og eldri. Gögnin eru vigtuð samkvæmt Þjóðskrá og endurspegla því þjóðina með tilliti til kyns, aldurs, búsetu og menntunar. Könnunin fór fram dagana 12. til 17. febrúar 2025.
Í spurningavögnum Maskínu, sem lagðar eru fyrir almenning reglulega, er að finna spurningar um málefni líðandi stundar. Þessar spurningar eru samdar af starfsfólki Maskínu. Niðurstöður eru birtar á heimasíðu Maskínu og einnig sendar á helstu fjölmiðla landsins. Maskína birtir ekki fréttir upp úr könnunum sem unnar eru fyrir aðra eða eru kostaðar af öðrum né sendir út fréttatilkynningar um niðurstöður þeirra.
Í könnunum Maskínu er þess gætt sérstaklega að úrtök endurspegli fjölbreytileika samfélagsins – svo sem hvað varðar aldursdreifingu, búsetu og menntunarstig. Upplýsingar um dreifingu svarenda eftir ólíkum hópum eru birtar með niðurstöðum hverju sinni svo fjölmiðlar og aðrir notendur geti lagt sjálfstætt mat á gæði mælinganna og hvaða viðhorf þær endurspegla.
Notkun á efni af heimasíðu Maskínu er heimil svo fremi sem vísað sé til heimilda og þess sé getið skýrt hver uppruni gagnanna er.
