Alls segjast 72,2% svarenda vera hlynnt (fremur eða mjög) því að framtíðarstaðsetning flugvallarins í Reykjavík verði í Vatnsmýrinni. Rösklega 17% segjast vera andvíg því (mjög eða fremur).
Meðaltalið á stikunni er á kvarða 1-5, þar sem mjög hlynnt(ur) fær gildið 5 og mjög andvíg(ur) gildið 1, en önnur gildi eru þar á milli. Meðaltalið er um 4, sem þýðir að allir svarendur eru fremur hlynntir að meðaltali að flugvöllurinn verði til framtíðar í Vatnsmýri.
Konur er fremur hlynntari því en karlar að flugvöllurinn verði í Vatnsmýrinni. Þá eru þeir sem hafa lokið háskólaprófi andvígari því að flugvöllurinn verði í Vatnsmýrinni heldur en þeir sem hafa lokið styttra námi. Íbúar á landsbyggðinni eru hlynntari því að flugvöllurinn verði í Vatnsmýrinni heldur en íbúar á höfuðborgarsvæðinu. Það vekur athygli að meirihluti Reykvíkinga, annarra íbúa höfuðborgarsvæðiðins og íbúa landsbyggðarinnar vill að flugvöllurinn verði áfram í Vatnsmýrinni.
Ekki reyndist marktækur munur á svörum þegar þau voru greind eftir aldri og fjölskyldutekjum.
Svarendur koma úr Þjóðgátt Maskínu, sem er panelhópur fóllks úr Þjóðskrá sem svarar á netinu. Svarendur eru af báðum kynjum, alls staðar að af landinu og á aldrinum 18-75 ára. Gögnin eru vigtuð með tilliti til kyns, aldurs og búsetu eins og það er í Þjóðskrá. Könnunin fór fram dagana 30. ágúst til 9. september 2013. Alls svöruðu 847 manns og var svarhlutfall tæplega 60% af upphaflegu úrtaki.
