Nýjasta Maskínukönnun sýnir að Halla Hrund Logadóttir leiðir, aðra könnunina í röð, í kapphlaupinu um Bessastaði. Katrín Jakobsdóttir fylgir fast á hæla hennar og er munurinn á þessum tveimur efstu frambjóðendum ekki marktækur. Hann var ekki heldur marktækur í síðustu könnun Maskínu. Aftur á móti er munurinn á fylgi Katrínar og Baldur Þórhallssonar, sem nú mælist þriðji, marktækur. Einnig er munurinn á Baldri og Jóni Gnarr marktækur. Það stefnir í spennandi vikur fram að kosningum.
Finna má skýrslu með ítarlegum niðurstöðum hér.
Könnunin var lögð fyrir Þjóðgátt Maskínu, sem er þjóðhópur fólks (e. panel) sem dreginn er með tilviljun úr Þjóðskrá, á netinu. Alls voru svarendur 1.236, en þeir eru alls staðar að af landinu og á aldrinum 18 ára og eldri. Gögnin eru vigtuð samkvæmt Þjóðskrá og endurspegla því þjóðina með tilliti til kyns, aldurs, búsetu og menntunar. Könnunin fór fram dagana 22. apríl til 3. maí 2024.
Í spurningavögnum Maskínu, sem lagðar eru fyrir almenning reglulega, er að finna spurningar um málefni líðandi stundar. Þessar spurningar eru samdar af starfsfólki Maskínu. Niðurstöður eru birtar á heimasíðu Maskínu og einnig sendar á helstu fjölmiðla landsins. Maskína birtir ekki fréttir upp úr könnunum sem unnar eru fyrir aðra eða eru kostaðar af öðrum né sendir út fréttatilkynningar um niðurstöður þeirra.
Í könnunum Maskínu er þess gætt sérstaklega að úrtök endurspegli fjölbreytileika samfélagsins – svo sem hvað varðar aldursdreifingu, búsetu og menntunarstig. Upplýsingar um dreifingu svarenda eftir ólíkum hópum eru birtar með niðurstöðum hverju sinni svo fjölmiðlar og aðrir notendur geti lagt sjálfstætt mat á gæði mælinganna og hvaða viðhorf þær endurspegla.
Notkun á efni af heimasíðu Maskínu er heimil svo fremi sem vísað sé til heimilda og þess sé getið skýrt hver uppruni gagnanna er.
