HÁTT Í 70% ÍSLENDINGA HAFA MIKLAR ÁHYGGJUR AF LOFTSLAGSBREYTINGUM Á JÖRÐINNI

Heim / Fréttir / HÁTT Í 70% ÍSLENDINGA HAFA MIKLAR ÁHYGGJUR AF LOFTSLAGSBREYTINGUM Á JÖRÐINNI

Töluverður meirihluti Íslendinga hefur miklar áhyggjur af loftlagsbreytingum á jörðinni, eða um 70%. Aðeins tæplega 7% segjast hafa litlar áhyggjur af loftlagsbreytingum á jörðinni en hartnær fjórðungur er þar á milli.

Konur hafa meiri áhyggjur af loftlagsbreytingum á jörðinni heldur en karlar. Á milli 73-74% kvenna segjast hafa miklar áhyggjur á meðan um 66% karla segja það sama. Töluverður munur var á svörum eftir menntun. Þeir sem hafa lokið háskólaprófi hafa í meirihluta miklar áhyggjur af loftlagsbreytingum, eða 73-82%, á meðan hátt í 46% af þeim sem hafa aðeins lokið grunnskólaprófi segjast hafa miklar áhyggjur.

Kjósendur flokkanna hafa misjafnar skoðanir á loftlagsmálum. Þeir sem hafa minnstar áhyggjur af loftlagsbreytingum á jörðinni eru kjósendur Framsóknar- og Sjálfstæðisflokks, en aðeins ríflega 50% kjósenda þeirra flokka segjast hafa miklar áhyggjur. Kjósendur Pírata, Samfylkingarinnar, Viðreisnar og Vinstri grænna hafa allir svipað miklar áhyggjur, en á milli 81-83% þeirra segjast hafa miklar áhyggjur.

Einnig var spurt hversu líklegt eða ólíklegt svarendur teldu að loftlagsbreytingar væru tilkomnar af mannavöldum. Slétt 3% telja að það sé ólíklegt á meðan hátt í 87% telja það líklegt.

Aftur var töluverður munur á milli svarenda eftir pólitískri skoðun. Á bilinu 67-70% kjósenda Sjálfstæðisflokksins og Framsóknarflokksins telja það líklegt að loftlagsbreytingar séu tilkomnar af mannavöldum á meðan 91-98% kjósenda annarra flokka telja það líklegt. Meðal annars telur enginn kjósandi Bjartrar framtíðar og Vinstri grænna í úrtakinu að það sé ólíklegt að loftlagsbreytingar séu af mannavöldum.

Svarendur voru 782 talsins, koma úr Þjóðgátt Maskínu, sem er þjóðhópur fólks (e. panel) sem er dreginn með tilviljun úr Þjóðskrá og svarar á netinu. Svarendur eru af báðum kynjum, alls staðar að af landinu og á aldrinum 18-75 ára. Gögnin eru vigtuð með tilliti til kyns, aldurs og búsetu samkvæmt Þjóðskrá og endurspegla því þjóðina prýðilega. Könnunin fór fram dagana 27. janúar til 6. febrúar 2017.

Skýrsluna í heild sinni má nálgast hér.

Aðrar fréttir